Kodi i Sjelljes

Terren është një vend ku blerësit, pronarët dhe agjentët takohen për të bërë biznes. Që ky takim të jetë i besueshëm, kërkojmë që të gjithë t'i ndjekin disa rregulla bazë.

Të gjithë përdoruesit pajtohen me këtë Kod kur krijojnë llogari. Pavarësisht rolit tuaj, ne presim:

• Saktësi — informacioni që ndani është i vërtetë dhe i përditësuar
• Respekt — komunikoni profesionalisht me përdoruesit e tjerë
• Transparencë — nuk fshihni detaje materiale që do të ndryshonin vendimin e palës tjetër
• Mirëbesim — veproni me palën tjetër ashtu si do të prisnit të vepronte ajo me ju

Çfarë presim nëse jeni duke kërkuar prona:

• Dërgoni mesazhe të qartë dhe specifik — agjenti/pronari ka nevojë të dijë çfarë po kërkoni
• Përgjigjuni mesazheve që merrni— edhe nëse vetëm për të thënë “faleminderit, nuk më intereson më” (heshtja pas kontaktit fillestar krijon konfuzion)
• Mos kërkoni vizitë nëse nuk jeni serioz — vizitat janë kohë e investuar nga agjenti/pronari
• Mos jepni informacione kontakti të rreme — numri i telefonit dhe emaili duhet të jenë realë
• Mos krijoni shumë llogari blerësish për të anashkaluar kufijtë e mesazheve ose për të kontaktuar të njëjtin agjent shumë herë

Nuk lejohet:

• Mesazhe abuzive, kërcënuese ose tallëse
• Spam (kopjimi i të njëjtit mesazh në shumë listime pa interes të vërtetë)
• Përpjekje për mashtrim (psh. premtim transferte parash në kushte të dyshimta)
• Përdorimi i platformës për qëllime jo-imobiliare (rekrutim, shitje produktesh, etj.)

Çfarë presim nëse jeni duke listuar pronën tuaj:

• Foto reale dhe të reja të pronës aktuale (jo render, jo foto stoku, jo foto nga interneti që nuk i përkasin pronës)
• Përshkrim i saktë i gjendjes, sipërfaqes, lokacionit dhe veçorive
• Çmim i hapurose statusi i qartë “me ofertë” — jo “thirrni për çmim” kur çmimi është i përcaktuar
• Përgjigje brenda 48 orëve ndaj kontakteve serioze nga blerësit
• Përditësim i statusit kur prona shitet, jepet me qira ose tërhiqet — për të mos lënë blerësit të pyesin më kot
• Verifikim opsional i identitetit (rekomandohet) — rrit besimin e blerësve dhe Pikët e Listimit

Nuk lejohet:

• Listime të shumëfishta për të njëjtën pronë (sistemi i zbulon dhe i bashkon automatikisht)
• Çmim i fshehur ose i ndryshuar gjatë bisedës krahasuar me atë që është listuar
• Përshkrim mashtrues (psh. “i ri” kur është 30-vjeçar; “pamje deti” kur nuk ka)
• Fshehja e problemeve materiale (dëme strukturore, parregullsi ligjore, shërbimet)
• Përdorimi i platformës për prona që nuk i zotëroni ose për të cilat nuk keni autorizim t'i listoni
• Tërheqja nga shitja pasi blerësi ka bërë kontakt serioz, vetëm për të rinegociuar çmimin

Çfarë presim nëse jeni agjent i pasurive të paluajtshme i verifikuar:

• Verifikim me dokumente — letërnjoftim + licencë profesionale. Nuk mund të publikoni si agjent pa kaluar verifikimin
• Profesionalizëm në komunikim me blerësit, pronarët dhe agjentët e tjerë
• Përgjigje të shpejtë — të paktën 80% e mesazheve duhet të marrin përgjigje brenda 24 orëve (kjo ndikon në Pikët e Profilit)
• Foto + përshkrim cilësor — agjentët priten të ofrojnë më shumë sesa pronarët privatë; Pikët e Profilit të ulëta dëmtojnë renditjen tuaj
• Marrëveshje e qartë me pronarin — mos listoni një pronë pa autorizimin e shkruar të pronarit
• Përdorim i ndershëm i boost-eve — boost-et janë mjete promovimi, jo zëvendësim për cilësi

Nuk lejohet:

• Sjellje anti-konkurruese — fyerje publike të agjentëve të tjerë, blerje boost-esh strategjike vetëm për të anashkaluar konkurrentin
• Mashtrim i pronarit — listim me çmim më të lartë sesa keni rënë dakord për të mbajtur diferencën
• Premtime të rreme për blerësit(“garanci kthimi nëse çmimi bie”, “ndihmë me hipotekë”, etj. nëse nuk i ofroni vërtet)
• Përfaqësim i dyfishtë i fshehur — nëse përfaqësoni si blerësin ashtu edhe pronarin, duhet ta tregoni qartë
• Çmime “me hapje” për të nxitur thirrje kur çmimi real është dukshëm më i lartë
• Ngarkimi i listimeve të rreme për të rritur trafikun në profilin tuaj

Bisedat brenda platformës janë private mes pjesëmarrësve. Megjithatë, sistemi ynë mund t'i rishikojë mesazhet vetëm në rast raportimi — për të verifikuar abuzimin.

Mos ndani të dhëna personale të ndjeshme në mesazhe (numra kartash, fjalëkalime, etj.). Përdorni kanale të sigurta kur është e nevojshme.

Mos i kërkoni blerësit/pronarit ta zhvendosë bisedën jashtë platformës para se të ketë kontakt të mirëfilltë — platforma ofron një histori të bisedës që mbron të dyja palët.

Disa lloje sjelljesh i konsiderojmë veçanërisht serioze dhe i trajtojmë me përparësi:

• Mashtrim financiar ose tentativë mashtrimi
• Kërcënime, ngacmim, ose përmbajtje e dhunshme
• Diskriminim (në bazë të racës, etnisë, gjinisë, fesë, orientimit seksual, gjendjes familjare, etj.)
• Përmbajtje seksuale e papërshtatshme
• Përmbajtje që promovon aktivitete të paligjshme
• Imitim i identitetit të një personi tjetër

Çdo përdorues mund të raportojë një listim, përdorues ose mesazh që mendon se shkel këtë Kod. Klikoni ikonën Raporto (në kartën e listimit, profilin e përdoruesit ose mesazhin specifik) dhe zgjidhni kategorinë. Shihni Si moderojmë listimet për detaje të plota.

Pas raportimit:

1. Rishikimi manual — një moderator vlerëson raportin brenda 48 orëve (më shpejt për raste serioze)
2. Vendimi — një nga këto: heqje e listimit / fshirje e mesazhit; paralajmërim formal (shkelje e parë e lehtë); pezullim i përkohshëm (shkelje e përsëritur ose e mesme); mbyllje e llogarisë (shkelje e rëndë ose e përsëritur)
3. Njoftimi — palëve të interesuara (raportuesi, i raportuari) u dërgohet rezultati me arsyetim

Çdo veprim moderimi mund të ankimohet. Hapni biletë Ankesë nga llogaria juaj; një moderator i dytë e rishqyrton rastin.

• Nuk ndërhyjmë në negocimet midis blerësve dhe shitësve — çmimi, termat e kontratës dhe çdo pjesë e marrëveshjes janë mes palëve
• Nuk garantojmë rezultatin e ndonjë transaksioni — fakti që një listim ekziston në Terren nuk është garanci për cilësinë, statusin ligjor ose vlerën e tregut
• Nuk shesim përparësi moderimi — të gjitha raportet trajtohen sipas urgjencës dhe ardhjes, jo sipas pagesës
• Nuk fshehim moderimin — çdo vendim ka arsye të shkruar dhe mund të ankimohet
• Nuk lejojmë moderim diskriminues nga ekipi ynë — moderatorët janë të trajnuar dhe punët e tyre janë subjekt audit-i

Mund ta përditësojmë këtë Kod herë pas here. Ndryshimet thelbësore do t'ju njoftohen me email + banner brenda platformës 30 ditë para hyrjes në fuqi. Për pyetje rreth Kodit të Sjelljes: info@terren.al.